Kyrkja lyser ut ei kombinasjonsstilling i Sunnhordland prosti, som 50 % sokneprest i Skånevik sokn i Etne kommune og 50 % prostiprest i Sunnhordland prosti.
Skånevik er «Sunnhordlands perle» - bygda mellom fjord og fjell som du finn på kartet omlag midt mellom Bergen og Stavanger. E 134 kjem over fjellet frå Oslo og går gjennom Etne kommune. Her er det kort veg til det meste.
Peparen i Skånevik. (Foto: Axel Krüger)
Er du glad i vakker og idyllisk vestlandsnatur, då er dette staden for deg. Lune små vikar med holmar og strender, med vakre solnedgangar, lukta av ferskt bakverk, flott idrettsanlegg og utebasseng, smilande sambygdingar og unik dugnadsvilje. Kommunen tilbyr gode oppvekstvilkår for barn og unge, med barne- og ungdomsskular i både Skånevik og Etne.
Her er rikt kulturliv og ei rekkje fritidstilbod for unge og vaksne, m.a. turn, fotball og korps. Pippifestivalen og Blues-festivalen i Skånevik trekker mange folk kvar sommar. Etne-fjella kan skilte med «Gullruta» med mange turistforeningshytter, og rike turmuligheter både sommar og vinter. Det er mange gode grunnar til å flytta til Etne kommune.
Du finn utfyllande informasjon her: MittEtne.
Skåneviks-bygda går rundt slik som bygder kan, men presten som støttar når livet går sin gang, manglar me. Er det deg?
Etne kommune har to sokn, Etne og Skånevik. Skånevik sokn er nordre del av kommunen med Skånevik kyrkje og Fjæra kapell inst i Åkrafjorden. I sør ligg Etne sokn med kommunesenteret. Etne sokn har 4 kyrkjer som ligg nokså tett i Etne sentrum. Her er alt frå steinkyrkje bygd i 1160-åra, til ny hovudkyrkje bygd i 2013. Kommunen har 4100 innbyggjarar, omlag 3200 (knapt 900 i Skånevik sokn) av desse er medlem av kyrkja. Prestane gjer teneste i heile kommunen.
Bilete: Skånevik kyrkje
Kontorstad for stillinga blir ved Etne kyrkjekontor. På kyrkjekontoret er det eit triveleg kontorfellesskap med sokneprestane i hhv. Etne og Skånevik, to organistar, kyrkjeverje, sekretær, kyrkjelydspedagog, barne- og ungdomsarbeidar, samt kyrkjegardsarbeidar. Det er godt samarbeid i staben!
I kombinasjon med stillinga som sokneprest i Skånevik sokn, skal ein arbeide som prostiprest i heile det flott og langstrakte prostiet i Sunnhordland, som omfattar dei sju kommunane Stord, Bømlo, Fitjar Sveio, Etne, Kvinnherad og Tysnes.
Søknadsfrist er 10. august 2025.
Sjå heile utlysingsteksten her:
https://arbeidsplassen.nav.no/stillinger/stilling/043a6236-494e-4d66-80dc-ee08f44d1927
KYRKJELIV:
Julevandring i Etne kyrkje 2024 med staben og frivillige.
Skånevik kyrkje
Fjæra kapell ligg inst i Åkrafjorden.
Koseleg adventssamling i Fjæra kapell.
GLIMT FRÅ SKÅNEVIK:
LARSEN BAKERI i Skånevik- eit håndverksbakeri etablert i 1888 som i dag blir drive i 5. generasjon. Eit ope bakeri der ein kan sjå bakarane i aksjon.
Sjøkanten Trivsel - Det flotte badeanlegget er eit imponerande døme på dugnadsånda i Skånevik. Lokalavisa Grannar skreiv om opninga av utandørsbadet i juni 2024.
Pippifestivalen 2025 i Skånevik - ei perle av ein familiefestival! På scena kan heile familien sjå teaterstykket «Pippi Langstrømpe» – eit stykke som skapar både latter, spenning og glede for barn og vaksne i alle aldrar! Det blir også dyrehage der ein kan kosa med dyra, hoppeslott for både små og litt større barn, kiosk og mange andre kjekke aktivitetar og overraskingar!
Skånevik Bluesfestival har halde koken sidan 1997. Mange store artistar frå inn- og utland har spelt i Skånevik opp gjennom åra.
Skånevik har gode båtforbindelsar, med hurtigbåt til Bergen og ferje til Kvinnherad. (Foto: Axel Krüger).
(Foto: Axel Krüger).
(Foto: Axel Krüger).
Velkommen til Skånevik! (Foto: Axel Krüger).